Agid finanzial

L'agid a victimas po surpigliar las consequenzas finanzialas d'in delict. La victima ed ils confamigliars pon ultra da quai survegnir ina satisfacziun morala per la suffrientscha psichica subida.

Titelbild - Agid finanzial

Avais Vus difficultads finanzialas en consequenza d'in delict? U avais Vus ina dumonda davart l'agid finanzial a victimas, p.ex. co che Vus pudais survegnir ina satisfacziun morala? Alura contactai in post da cussegliaziun da l'agid a victimas. Quel po conceder a Vus agid finanzial immediat ed As sustegnair en dumondas da sustegn finanzial.

Qua chattais Vus tut ils posts da cussegliaziun da l'agid a victimas

Agid immediat

En cas urgents po l'agid a victimas surpigliar ils custs resultads d'in delict (agid immediat). Quai èn p.ex. ils custs per

  • in segiurn en ina chasa da dunnas per Vus e Voss uffants,
  • in'intervenziun terapeutica en cas da crisa u
  • emprims scleriments tras in'advocata u in advocat u
  • l'emprim provediment medicinal.

Agid a pli lunga vista

L'agid a victimas po finanziar ulteriurs sustegns da terzs che stattan en connex cun il delict, in uschenumnà agid a pli lunga vista. Quai èn per exempel ils custs per

  • in segiurn pli lung en la chasa da dunnas,
  • ina psicoterapia u
  • la represchentaziun tras in'advocata u in advocat en la procedura penala.  

L'autezza da quest agid finanzial dependa da la situaziun finanziala da la victima.

Indemnisaziun

L'agid a victimas po surpigliar donns finanzials resultads dal delict, p.ex. indemnisar la perdita da paja u las spesas da viadi. Er ils custs da sepultura u ils custs d'in agid en il tegnairchasa pon vegnir indemnisads da l'agid a victimas, dentant betg donns materials.

L'autezza da l'indemnisaziun dependa da la situaziun finanziala da la victima.

Satisfacziun morala

A victimas pertutgadas particularmain ferm d'in delict po l'agid a victimas porscher ina satisfacziun morala. La satisfacziun morala è in'indemnisaziun ed ina reparaziun per la suffrientscha psichica subida. En questa moda presta il stadi ina contribuziun da solidaritad e renconuscha la situaziun difficila da la victima u da ses confamigliars.

Per inoltrar dumondas d'indemnisaziun e da satisfacziun morala èsi da resguardar ils termins da scadenza. As drizzai perquai a temp ad in post da cussegliaziun da l'agid a victimas.