A tgi sa drizza l'agid a victimas?

Tut las persunas ch'èn daventadas en Svizra victima d'in act da violenza fisic, psichic u sexual sin fundament d'in delict, han il dretg da survegnir sustegn da l'agid a victimas.

Titelbild - A tgi sa drizza l'agid a victimas?

L'agid a victimas è qua per tut las persunas ch'èn daventadas en Svizra victima d'in delict,

  • independentamain da lur schlattaina, da lur vegliadetgna, lur orientaziun sexuala u lur religiun.
  • independentamain da tge pajais ch'ellas derivan u sch'ellas stattan en Svizra per pli lung u pli curt temp.

Er ils confamigliars da las victimas e las persunas che stattan datiers ad ellas pon profitar da l'agid a victimas.

L'agid a victimas gida independentamain dal fatg, sch'ina denunzia penala è vegnida inoltrada u sch'il delinquent u la delinquenta ha pudì vegnir chattà. I na gioga era nagina rolla, sch'il delict è succedì intenziunadamain u per negligientscha.

Co survegnis Vus agid?

As drizzai ad in post da cussegliaziun da l'agid a victimas. Las cussegliadras ed ils cussegliaders As sustegnan en tut las dumondas da l'agid a victimas. Posts da cussegliaziun datti en l'entira Svizra. Ans contactai era, sche Vus n'essas betg segira/segir, sch'il post da l'agid a victimas è il dretg lieu per Vus. L'agid a victimas As infurmescha en mintga cas a tgi che Vus pudais As drizzar.

Qua chattais Vus ils posts da cussegliaziun da l'agid a victimas

Cura gida l'agid a victimas?

L'agid a victimas porscha sustegn a las victimas da delicts, per exempel en cas da:

  • violenza fisica (p.ex. blessura corporala, assagl da rapinament u mazzament);
  • violenza sexuala (p.ex. mulesta sexuala, abus sexual u violaziun);
  • violenza a chasa (p.ex. smanatscha u stalking) u
  • accidents da traffic.

Auters delicts da violenza, nua che l'agid a victimas po gidar

Delicts succedids a l'exteriur

En cas d'in delict succedì a l'exteriur porscha da princip il stadi, en il qual è succedì il delict, l'agid a victimas. En intgins cas è ina cussegliaziun e tschertas prestaziuns finanzialas pussaivlas era da vart da l'agid a victimas en Svizra. La premissa principala è che la victima era domiciliada en Svizra il mument dal delict. In'indemnisaziun e satisfacziun morala èn exclusas per delicts succedids a l'exteriur.

Dapli infurmaziuns