Cussegliaziun

La cussegliaziun da l'agid a victimas è gratuita. Ella è confidenziala e sin giavisch er anonima: nagin na vegn a savair insatge da Voss'istorgia, sche Vus na vulais betg quai. Era betg la polizia.

Ils telefons che vegnan fatgs al numer 142, na figureschan ni sin il quint da telefon ni sin il document da cumprova da las colliaziuns telefonicas. Resguardai per plaschair ch’ils telefons che Vus avais fatg cun Voss apparats finals (smartphone u rait fixa), pon però esser visibels en la glista dals numers cumponids. Sche necessari, po l’inscripziun vegnir stizzada manualmain.

Tut las collavuraturas ed ils collavuraturs da l'agid a victimas èn persunas dal fatg. Sch'i fa da basegn, collavuran ellas cun interpretas ed interprets – er en la lingua da segns. La cussegliaziun da l'agid a victimas resguarda ils basegns d'umans cun restricziuns.

Per tgi è la cussegliaziun?

La cussegliaziun da l'agid a victimas è qua per tut ils umans ch'èn vegnids nuschids en Svizra fisicamain, psichicamain u sexualmain sin fundament d'in delict. I na gioga nagina rolla tge schlattaina u vegliadetgna u tge orientaziun sexuala u religiun che Vus avais. Il sustegn è independent dal pajais, dal qual Vus derivais u dal temp che Vus As trategnais en Svizra. I n'è era betg ina premissa d'avair inoltrà ina denunzia penala.

Er ils confamigliars da la victima e persunas che stattan datiers ad ella u uffants cunpertutgads da violenza pon sa drizzar a la cussegliaziun a victimas. Ils posts da cussegliaziun cusseglian ed infurmeschan ultra da quai era persunas interessadas e persunas dal fatg.

Ans contactai, era sche Vus n'essas betg segira/segir, sche l'agid a victimas è il dretg lieu per Vus. L'agid a victimas As infurmescha en mintga cas a tgi che Vus pudais As drizzar.

Tge cumpiglia ina cussegliaziun da l'agid a victimas?

Contactai in post da cussegliaziun per telefon (sut il numer 142 sco er sut ils numers dals posts da cussegliaziun chantunals per l’agid a victimas) u e-mail. Sche Vus vulais, pudais Vus fixar in termin e vegnir sperasvi per in discurs en il post da cussegliaziun. Las collavuraturas ed ils collavuraturs da l'agid a victimas

• taidlan quai che Vus raquintais ed As gidan ad elavurar quai ch'è succedì.
• As gidan a decider co cuntinuar ed a chattar soluziuns.
• As infurmeschan davart Voss dretgs ed As decleran p.ex. co che Vus pudais proceder dal punct da vista giuridic.  
• As cusseglian, p.ex. en connex cun las assicuranzas.  
• prestan en cas urgents agid finanzial immediat ed As sustegnan en dumondas d'indemnisaziun e da satisfacziun morala.
• procuran per ulteriur agid: p.ex. in'advocata u in advocat ubain agid psicologic u medicinal.
• As pon gidar a chattar in lieu protegì.

As annunziai – ils posts da cussegliaziun da l'agid a victimas pon gidar

Qua chattais Vus tut ils posts da cussegliaziun da l'agid a victimas