Incendi grond a Crans-Montana (VS)
La notg da Son Silvester è rut ora in incendi en ina bar a Crans-Montana (VS). Almain 40 persunas han pers lur vita en quel, passa 100 persunas èn vegnidas blessadas.
Essas Vus vegnids blessads en moda fisica u psichica tras l’incendi grond en ina bar a Crans-Montana?
È in da Voss confamigliars pertutgà da quest eveniment, e na savais Vus betg tge far? L’agid a victimas As po sustegnair.
Il motiv per l’incendi en la bar «Le Constellation» a Crans-Montana n’è anc betg dal tuttafatg sclerì. La Procura publica dal chantun Vallais ha instradà ina inquisiziun penala. Tenor ils resultats actuals da l’investigaziun po in attentat vegnir exclus. Tar la disgrazia tragica èn mortas almain 40 persunas, 116 èn vegnidas blessadas, per part grevamain, tras l’incendi. Las persunas blessadas èn vegnidas transportadas en differents ospitals, tranter auter a Sion, Visp, Losanna (CHUV), Genevra (HUG), Friburg, Berna e Turitg. L’adressa dad e-mail, line.help@police.vs.ch, porscha agid u emprimas infurmaziuns als confamigliars ed a las persunas che han ina stretga relaziun cun victimas, sco er a las persunas blessadas ed a las perditgas. Ultra da quai stat er l’agid a victimas (posts da cussegliaziun per l’agid a victimas) a disposiziun a las victimas ed a lur confamigliars. Quel presta er agid immediat.
Sche Vus, Voss confamigliars u persunas che han ina stretga relaziun cun Vus, essas vegnids blessads en moda fisica u psichica tras l’incendi a Crans-Montana, pudais Vus As drizzar a l’agid a victimas d’in chantun. La cussegliaziun da l’agid a victimas è gratuita e confidenziala. Vus pudais tscherner libramain in post da cussegliaziun per l’agid a victimas.
Qua chattais Vus tut ils posts da cussegliaziun svizzers per l’agid a victimas
Contactai in post da cussegliaziun per telefon u per e-mail. Sche Vus n’essas betg segirs, sche l’agid a victimas è il dretg post da contact, As annunziai tuttina. L’agid a victimas As infurmescha, tgi che As po gidar vinavant.
Tge po l’agid a victimas far per Vus?
Las persunas dal fatg dals posts da cussegliaziun per l’agid a victimas pon per exempel:
- tadlar quai che Vus raquintais ed As gidar ad elavurar quai ch’è capità;
- As infurmar davart Voss dretgs;
- As sustegnair en dumondas dal dretg d’assicuranzas u en la procedura penala;
- sut tschertas premissas procurar per in ulteriur sustegn, per exempel in’advocata u in advocat ubain agid psicologic u finanzial.
Infurmaziuns supplementaras davart ils servetschs da cussegliaziun chattais Vus qua